دروس خصوصيه (تعال تعلم شلون تنسق بلجات)

الجات تعني بالعربي سوالف والسوالف تعني الكلاوات والكلاوات تعني تصفيط حجي والحجي من يرجع من مكه يصيحوله حجي والحجي يصرف هواي حبوب زرقاء والزرقاء مدينه بالاردن والاردن دوله مجاوره للعراق والعراق دوله ديمقراطيه والديمقراطيه تعني الحريه والحريه تعني الاباحيه والاباحيه تعني المصلخه والمصلخه تروح للنار والنار هي مثل الجات



اذا الجات والنار نفس الشئ وديري بالج يابنيه من النار


شلون تنسق بالجات




الدرس الاول
دائما كون غير مرئي بالماسنجر انفزبل دائما اكيد يوم من الايام راح تسئلك ليش انتي مخفي راح تكولها والله من اصير مرئي هواي اكو بنات على القائمه مالتي بس اني احب احجي وياج بس انتي لانه احسك اكثر ثقافه من غيرج ( ثقافه مو ابن التافه علينه ابو الثقافه )


الدرس الثاني
البنيه تحب شبيها بالطباع يعني انت اذا تحسها جديات صير جديات مثلها اذا تحسها تحب الشقه والمرح انت صير مثلها دم خفيف وضحك



الدرس الثالث
اذا البنيه ضحكت انت راسا كولها الله اكيد هاي الضحكه تنفع رنه مال موبايل بس اني مستحيل احطها بالموبايل مالتي هي راح تكولك ليش ليش انت تجاوبها لانه اذا رن الموبايل مالتي بالضحكه مالتج اكيد اني ما راح اجاوب على المتصل ابقه بس صافن على هاي الضحكه الرنه البتهوفنيه السنفونيه

الدرس الرابع
اذا حجيت وياها يوم السبت والاحد لا تحجي وياها الاثنين ولا الثلاثاء ولا الاربعاء تعوفها اسبوع وبعدين ترجع تحجي وياها وره اسبوع لمده ربع ساعه ليش حتى تفهمها انت شايف وعايف مو لزكه لاتصير لزكه وخلال الاسبوع اذا دزت مسج اوف لاين لا ادز جواب خليها سكته


الدرس الخامس
من تفتح الجات وياها لا يكون سلامك تقليدي لا استعمل هلو قاروره عطر الياسمين شلونك بندق
او تكولها من اول ماتفتح الجات وياها تكولها وبدون سلام تكولها اني عندي مشكله هي راح تجاوبك خير تكولها من اسلم عليج اتعب حيل راح تكولك ليش تجاوبها تكول لانه دائما اكون في سباق مع قلبي منو يسلم عليج الاول اني لو قلبي ودائما قلبي يفوز ويسلم عليج ههههههه كلاوات هو الجات كلاوات
وداعتك وره هاي الحجايه تكوم تحلم بيك كل ماتنام حتى لو الكهرباء مطفيه والحر واصل لابو موزه

الدرس السادس
دائما يكون عندك معرفه بالموده بالعطور بالمكياج بالفن ودائما تخليها تشعر انت ضد التقاليد تكولها اني من ازوج ما احب زوجتي تظل بالبيت ترتب البيت وتطبخلي لا احبها تكون تعمل لان شخصيتها راح تصير ارق من ان تبقه بالبت تنظف وتمسح احب البنيه الي الها دور اجتماعي بالمجتمع من اروح فدوه للمجتمع


الدرس السابع
والله لو تطلع روحك ما اكولك بعد شنو تريد تخربط الشغل عليه كافي عليك الدروس السابقه




الهدف من هذا الموضوع هو رساله الى البنات الي تدخل جات لا تثقي بالجات واكو هواي ضحايا من البنات راحوا بسبب هذا الجات مهما يكون الشخص الي تحجين وياه لا تثقين بيه واياج صوره من صورك تروح او رقم الموبايل مالتج او اي عنوان الج تره الجات مثل النار تاكل البنيه ماتاكل الولد
الولد من يصيد ابنيه بالجات يكولون عليه لوتي بس البنيه الي توكع بالجات يكولون عليها مطفيه
فقيره وتره مو كل اصابعك سوه خاصتا من البرنس على الجات كلش امين وحباب من تريدين جات تعالي على البرنس ورده مال الله ههههههه قابل الوادم تكاطعت لو تكاطعت

لا عليك اللة كمل الدرس السابع لين ضل اب حصرتي ههههههههههه